Ja, vi blir med i Team Vestland!
Vi støttar heilhjarta opp om Team Vestland-satsinga. Den legg vekt på samarbeid og deling av kunnskap, ressursar og erfaringar for å lukkast med grøn region. Samarbeid har vore oppskrifta til IT Forum sidan det blei etablert i 1995.
Det seier styreleiar for IT Forum Vest, Christiane Ulriksen, som svar på oppfordringa frå leiinga i Vestland fylkeskommune under nyttårsmøtet denne veka.
Der lanserte fylkesordførar Jon Askeland og fylkesvaraordførar, Natalia Golis Team Vestland for å mobilisere til samarbeid om grøn vekst og nye grøne arbeidsplassar i fylket.
Vi er med! Dette er heilt naturleg for oss og vi skal vere ein god lagspelar og bidra inn for å finne dei gode løysingane, slik vi har gjort før. Les vår historie.
Ny strategi
I desse dagar utformar styret i IT Forum Vest ny strategi for dei komande åra. Her kjem vi til å ta inn satsingane til fylkeskommunen. Så skal vi halde fram og bli meir spissa på satsingar de kjenner godt frå før og med merksemd på heile Vestland:
Vi skal bidra inn i arbeidet med ny strategi for breiband i alle kommunar, eit arbeid som startar no.
Vi skal bidra til at regionen har rett kompetanse for framtida gjennom arbeidet vårt i nettverket for Rekruttering og Mangfald.
Vi skal bidra til at regionen nyttar seg av IKT i helse, oppvekst og utdanning.
Detaljane rundt dette skal vi kome tilbake til.
Har du innspel og idear, ta kontakt med administrasjonen (sjå kontaktinfo under). Engasjement set vi stor pris på!
Fylkesvaraordførar Natalia Golis og fylkesordførar Jon Askeland under det digitale Nyttårsmøtet 2022.