Marianne har stor tru på lokale nettverk
Eg har tru på at ved å bygge lokale nettverk kan vi samarbeide på tvers av organisasjonar i mykje større grad enn vi gjer i dag.
Det seier avdelingsdirektør, Marianne Skjeldestad Hove, i Lotteri- og stiftelsestilsynet i Førde, etter medlemsturen i regi av IT-forum Vest. Også Sunnfjord Utvikling, Innovasjon Norge Vestland, Vestland fylkeskommune og fleire frå Lotteri- og stiftelsestilsynet deltok, i lag med Digdir.
Vertskap for turen var Ivar Petter Grøtte og Anne Mette Hjelle i IT-forum Vest. På programmet sto deltaking på Digitaliseringskonferansen 2023 og besøk hos Digital Norway.
Her er hennar refleksjonar i etterkant av turen:
- Vi digitaliserer for frivillig sektor!
Vi er den største tilskotsforvaltaren av statlege tilskot til frivillig sektor. Dette krev at vi er oppdatert og tett på utviklinga i samfunnet.
I år henta vi inspirasjon på Digitaliseringskonferansen til Digitaliseringsdirektoratet, og blei topp motivert for å fortsette det viktige arbeidet. Eg syntest Digdir traff godt med tittelen: Tøffere tider – tid for lagspill!
Samarbeid på tvers er avgjerande for å lukkast. Saman er vi best! Konferansen minner oss på kor viktig det er å fortsette arbeidet på tvers av organisasjonar for å forenkle for frivillig sektor.
Lotteritilsynet deltek i fleire pågåande prosessar der vi samarbeidar med Brønnøysundregistrene, Kultur- og likestillingsdepartementet, Frivillighet Norge, Fundraising Norge, Oslo kommune og Direktoratet for forvaltning og økonomistyring:
Livshendelsen «starte og drive en frivillig organisasjon»
Digitalt økosystem for deling av data for frivillige organisasjoner
Tilskudd.no
Det var ekstra kjekt å kombinere Digitaliseringskonferansen med medlemstur med IT-forum Vest. Det var første gang eg deltok på arrangement med IT-Forum Vest. Vi var ein fin gjeng på 8 personar som reiste i lag.
Ved å reise samla fekk vi i tillegg til sjølve konferansen nyttige diskusjonar og hyggeleg sosialt samvær. Anne Mette hadde tenkt på det meste og hadde sjølvsagt sørga for felles bord under middagen. Det var veldig kjekt!
Eg har tru på at ved å bygge lokale nettverk kan vi samarbeide på tvers av organisasjonar i mykje større grad enn vi gjer i dag. Eg er klar for neste studietur med IT-Forum Vest – ryktet går om New York!
IT-forum Vest takkar Marianne Skjeldestad Hove både for deltaking, tekstbidrag og spenstig forslag til neste studietur. Den skal vi diskutere til hausten og under den komande IT-konferansen - denne gong i Bergen den 28.-29. november. Påmelding opnar i byrjinga av september, men hald av dagane. Vi lovar å toppe fjorårets konferanse!
God sommar til alle! :-)
Besøk hos Digital Norway. Det er ein non-profit organisasjon som starta i 2017 av 15 engasjerte næringslivsaktørar for å få fart på digitalisering av norsk næringsliv. Dei har særleg fokus på små og mellomstore bedrifter. Les meir på digitalnorway.com
Tøffare tider - tid for lagspel!
Marianne Skjeldestad Hove henta inspirasjon frå årets Digitaliseringskonferanse! Å delta i lag med fleire andre frå regionen var ekstra kjekt, skriv ho i dette innlegget.
Frode Danielsen er ny i rolla som direktør i Digitaliseringsdirektoratet. Han var vertskap for denne faglege og sosiale årlege konferansen, der nær 900 var påmeldt i år. Foto: Digitaliseringskonferansen 2023.
Digitaliseringskonferansen ved Olav Skarsbø frå Digdir tok seg godt av gjengen frå Vestlandet og sørga for eige bord. F.v. Bente Hauge i Sunnfjord Utvikling, Siw Heggedal Longvastøl i Stiftelsestilsynet, Marianne Skjeldestad Hove frå Lotteri- og stiftelsestilsynet, Hans Inge Gloppen frå Vestland fylkeskommune, Falk Tewes frå Lotteri- og stiftelsestilsynet, Ivar Petter Grøtte frå Vestlandsforsking/IT-forum Vest, Reidun Nesheim frå Innovasjon Norge Vestland, Sogndal. Foto: Anne Mette Hjelle.